May nakahandang contingency measure o security plan ang gobyerno sakaling mangyari ang worst case scenario sa West Philippine Sea (WPS), lalo na sa patuloy na pagiging agresibo ni China sa lugar.
Nakahanda ang Armed Forces of the Philippines na ipatupad ang nasabing plano upang mapanatili ang seguridad at soberanya sa nasasakupan.
Ayon kay Usec. Alexander Lopez, Spokesperson ng National Maritime Council, bahagi ito ng kanilang paghahanda sa posibleng worst case scenario kung sakaling muling lapitan nang mas malapit ni China ang BRP Sierra Madre. Binigyang-diin niya na walang makapipigil sa Pilipinas sa pagpapatuloy ng rotation at resupply missions sa mga tropa na nakabase sa nasabing barko.
Ipinaliwanag ni Lopez na karapatan ng bansa na ituloy ang mga routine na operasyon sa kabila ng patuloy na tensyon sa West Philippine Sea.
Binanggit din niya na nakasaad sa provisional understanding sa pagitan ng Pilipinas at China na hindi dapat gambalain, harangin, o guluhin ang mga karaniwang operasyon ng Pilipinas sa nasabing lugar.
Sa kasalukuyan, nakabantay ang ating mga tropa sa loob ng 24 oras at patuloy nilang idinodokumento ang lahat ng galaw ng mga barko ng China at mga Chinese militia vessels sa West Philippine Sea. Mahalaga ang patuloy na pagmamatyag upang mapanatili ang kaligtasan at integridad ng mga operasyon sa nasabing bahagi ng karagatan.
Inaasahan na ang mga hakbang ay magsisilbing proteksyon sa bansa at sa mga Filipino na nagsasagawa ng kanilang mga routine missions sa WPS upang mapanatili ang soberanya sa teritoryo.
