Nagbabala ang Philippine Drug Enforcement Agency (PDEA) at Dangerous Drugs Board (DDB) laban sa itim na sigarilyong kilala sa lokal bilang “tuklaw” na umano’y mas mapanganib at mas potent kaysa sa marijuana.
Batay sa pagsusuri ng PDEA, naglalaman ito ng tabako na kilala sa Vietnam bilang “thuoc lao” na may 9% nicotine content—tatlong beses na mas mataas kumpara sa karaniwang sigarilyo na nasa 1% hanggang 3% lamang. Mayroon din itong synthetic cannabinoid na ginagaya ang epekto ng marijuana ngunit mas malakas at delikado.
Ayon sa mga eksperto, maaaring magdulot ang “tuklaw” ng hallucinations, psychotic episodes, at seizure-like symptoms gaya ng biglaang panginginig o pag-jerk ng katawan. Dahil dito, sisimulan na ng PDEA at DDB ang proseso para maisama sa listahan ng dangerous drugs ang nasabing sangkap.
Tiniyak ng dalawang ahensya na makikipag-ugnayan sila sa iba pang ahensya ng gobyerno at mga eksperto sa kalusugan upang makabuo ng komprehensibong polisiya para maprotektahan ang publiko laban sa mga mapanganib at nakaka-adik na sangkap.
