Aminado si Pangulong Ferdinand R. Marcos Jr. na marami pang ghost at palpak na flood control projects, gaya ng sa Barangay Piel, Baliuag, Bulacan.
Ayon sa Pangulo, nakakalungkot ngunit marami pang mga proyekto na may kinalaman sa flood control na pawang guni-guni lamang.
Simula nang ilunsad ang “Sumbong sa Pangulo” website, dumami ang mga ulat na natatanggap nila hinggil sa mga reklamong kaugnay sa mga flood control projects.
Aniya, kanila itong tataglaying maigi at tatanggapin ang mga ito upang mapag-ukulan ng kaukulang aksyon. Siniguro rin ng Pangulo na hindi sila titigil hanggang mailantad ang pagkakakilanlan ng mga nasa likod ng multi-bilyong anomalya sa mga naturang proyekto.
Dagdag pa ng Pangulo, kakasuhan nila ang mga sangkot na contractor at iba pang mga personalidad na may kinalaman sa malawakang irregularidad.
Una nang pinigilan ni President Ferdinand “Bongbong” Marcos Jr. ang paglabas ng kabuuang pondo na nasa P60 hanggang P80 bilyon para sa mga infrastructure projects ng Department of Public Works and Highways (DPWH) sa ilalim ng 2025 national budget. Ang mga pondong ito ay pinalutang na isinisingit lamang ng Kongreso at hindi naka-align sa Philippine Development Plan ng administrasyon.
Sa kasalukuyan, may legal team na nakatutok sa paghahanda ng mga hakbangin laban sa mga personalidad na dawit sa irregularidad hinggil sa flood control projects. Pagsisiguro ng Pangulo, hahabulin nila ang mga nasa likod ng mga anomalya, kabilang dito ang mga contractors, tagapagpatupad ng DPWH, at mga proponents.
