Nagsimula nang tumaas ang presyo ng mga palay sa anim na pangunahing rice-producing regions sa bansa, ayon sa National Food Authority (NFA). Ang pagtaas ng presyo ay nasa pagitan ng 0.3 hanggang 2.6 porsyento sa mga rehiyon ng Bicol, Central Visayas, at ilang bahagi ng Mindanao.
Ang nasabing pagtaas ay nangyari ilang araw bago magsimula ang iniutos ni Pangulong Ferdinand Marcos Jr. na pagsuspinde sa importasyon ng bigas.
Sa kasalukuyan, ang average na presyo ng palay ay nasa P16.98 kada kilo sa Central Luzon at P20.59 kada kilo sa Southern Mindanao. Habang nananatili namang walang pagbabago sa presyo sa Southern Tagalog na P16.52 kada kilo, at P17.60 naman sa Western Visayas.
Samantala, may mga rehiyon na nakaranas ng pagbaba sa presyo ng palay. Kasama dito ang Ilocos, Cagayan Valley, Eastern Visayas, Northern Mindanao, at Bangsamoro Autonomous Region in Muslim Mindanao (BARMM). Ang pagbabagong ito ay maaaring resulta ng pabagu-bagong supply at demand, pati na rin ng lokal na kalagayan sa pagtatanim at suplay.
Sa darating na Setyembre, ipatutupad na ang isang 60-araw na import ban sa mga imported na bigas bilang hakbang upang maprotektahan ang mga lokal na magsasaka.
Ito ay bahagi ng mga hakbang na inilunsad ng pamahalaan upang mapanatili ang katatagan ng presyo at makapagbigay ng patas na kita sa mga lokal na producer.
