Sugatan ang isang pulis, at ang angkas ng isang rider matapos masangkot sa aksidente sa Barangay Dapawan, Odiongan, Romblon, habang isinasagawa ang operasyon ng Land Transportation Office (LTO) at Odiongan Municipal Police Station nitong umaga ng August 7.
Batay sa imbestigasyon ng Odiongan MPS, nagsasagawa ng law enforcement operation ang LTO at pulisya sa tapat ng barangay hall nang mapansin ang isang motorsiklong paparating mula Barangay Pato-o patungong bayan.
Pinahinto ito ng LTO personnel para sa inspeksyon ngunit hindi tumigil ang rider at nagpatuloy sa pagmamaneho.
Isang pulis ang nagtangkang harangin ang motorsiklo upang pigilan ang pagtakas, ngunit sinadyang banggain umano ng rider ang opisyal.
Sa lakas ng impact, nagtamo ng pinsala ang pulis. Bumagsak din ang motorsiklo at tumilapon ang rider at angkas nito.
Agad inaresto ng mga rumespondeng pulis ang menor de edad na driver at binigyan ng paalala tungkol sa kanyang karapatan. Pawang mga menor de edad ang rider at angkas nito batay sa ulat ng pulisya.
Dinala ang lahat ng nasugatan sa Romblon Provincial Hospital para lapatan ng lunas.
