Isinusulong ni Paranaque 2nd District Rep. Brian Raymund Yamsuan ang House Bill No. 3215, na kilala bilang Magna Carta for Barangay Health Workers (BHWs). Layunin nitong mabigyan ng mas makabuluhang benepisyo ang tinatayang 230,000 barangay health workers sa buong bansa kapag naisabatas.
Ayon kay Yamsuan, ang panukala ay naglalayong maibigay sa BHWs ang buwanang honoraria na nagkakahalaga ng P3,000 hanggang P5,000.
Kabilang din sa mga benepisyo na nakapaloob sa batas ang hazard allowance na hindi bababa sa P1,000 kada buwan, subsistence allowance na hindi bababa sa P100 kada araw, at transportation allowance na hindi bababa sa P1,000 kada buwan. Mayroon ding isang beses na gratuity cash incentive na P10,000 para sa mga BHWs na nakapaglingkod nang hindi bababa sa 15 taon.
Bukod dito, nakapaloob sa panukala ang insurance coverage sa ilalim ng Government Service Insurance System, pati na rin ang mga programa para sa training, edukasyon, at career enrichment.
Kasama rin dito ang automatic na Philhealth membership bilang bahagi ng health benefits, mga leave credits, cash gifts, at civil service eligibility para sa mga BHWs na may limang taong serbisyo.
Binigyang-diin ni Yamsuan na panahon na upang mabigyan ng nararapat na benepisyo ang mga BHWs bilang pagkilala sa kanilang mahalagang kontribusyon sa pagpapalakas ng health care system ng bansa.
