Arestado ang isang 25-anyos na empleyado ng isang electric cooperative matapos siyang mabilhan umano ng ipinagbabawal na droga sa halagang ₱500 sa isinagawang buy-bust operation kagabi sa Sitio Upper, Barangay Dapawan.
Batay sa ulat ng Romblon Police Provincial Office, nakabili umano ang poseur buyer ng isang sachet ng hinihinalang shabu mula sa suspek bandang alas-9 ng gabi, August 15.
Agad itong inaresto ng mga operatiba mula sa Odiongan Municipal Police Station matapos ang transaksyon.
Bukod sa sachet na subject ng buy-bust, nakumpiska pa sa pag-iingat ng suspek ang karagdagang iligal na droga.
Isinailalim sa inventory ang mga nakuhang ebidensya bago ito dinala, kasama ang suspek, sa Romblon Provincial Crime Laboratory Office para sa pagsusuri.
Kasalukuyang nakakulong ang suspek at sasampahan ng kasong paglabag sa Comprehensive Dangerous Drugs Act of 2002.
