Iminungkahi ni Senador JV Ejercito na mag-leave of absence muna si Department of Public Works and Highways (DPWH) Secretary Manuel Bonoan habang isinasagawa ang imbestigasyon ukol sa mga maanomalyang flood control projects.
Ayon sa senador, upang maiwasan ang posibleng impluwensya ng kalihim sa isinasagawang pagsisiyasat, mas mainam na pansamantala itong lisanin ang kanyang posisyon.
Gayunpaman, aminado si Ejercito na magiging hamon ang pagtatalaga ng Officer-in-Charge (OIC) dahil maging ilang undersecretaries at assistant secretaries ng DPWH ay may kinahaharap ding mga isyu.
Nilinaw rin niya na hindi pa panahon upang magbitiw mula sa puwesto si Bonoan habang walang matibay na ebidensyang direktang nag-uugnay sa kanya sa mga alegasyon.
Sa kabilang banda, sinabi ni Ejercito na kung mapatunayang may katotohanan ang mga alegasyon laban kay Bonoan ukol sa ghost projects, nararapat na magsumite siya ng resignation. Aniya, hindi dapat manatili sa posisyon ang isang opisyal na napatunayang may kasalanan o pagkukulang.
Nang tanungin naman ang senador kung kailangan bang magkaroon ng overhaul sa loob ng DPWH, sinabi niya na mainam na magsagawa ng regular na re-shuffling sa mga district engineers upang mabawasan ang kanilang pagiging pamilyar sa mga politiko o opisyal ng gobyerno. Naniniwala si Ejercito na makatutulong ito upang masupil ang mga iregularidad at katiwalian sa ahensya.
Tungkol naman sa mga kasamahan niyang senador, sinabi ni Ejercito na wala siyang nakikitang kontratista sa kanilang hanay, ngunit pinaliwanag niya na para mas masiguro, mahalagang suriin ang lahat ng dokumento at impormasyon upang walang itinatagong bagay.
