Ibinahagi ng Department of Foreign Affairs (DFA) na umabot na sa kabuuang 35 diplomatic protest ang naihain ng Pilipinas laban sa China ngayong taon. Lahat ng mga ito ay pormal na isinumite sa Chinese Embassy sa Maynila.
Ayon kay DFA Spokesperson Angelica Escalona, hindi pa kabilang sa bilang ang mga posibleng ihain na diplomatic protest kaugnay ng mga kamakailang insidente ng harassment at mapanganib na maniobra ng mga barko at eroplano ng China laban sa mga yunit ng Pilipinas sa Bajo de Masinloc (Scarborough Shoal).
Isa sa mga insidente na ito ay noong August 11, kung saan nagkaroon ng banggaan sa pagitan ng barko ng China Coast Guard (CCG) at isang warship ng People’s Liberation Army (PLA) habang hinahabol ang BRP Suluan ng Philippine Coast Guard. Nasira ang barko ng CCG at hindi na ito nakalalayag.
Sa araw ring iyon, dalawang barko ng CCG ang gumamit ng water cannon laban sa dalawang barko ng Bureau of Fisheries and Aquatic Resources (BFAR) na nagsasagawa ng maritime patrol sa lugar.
Noong August 13, isang J-15 fighter jet ng PLA Naval Air Force ang nagsagawa ng mapanganib na paglapit sa isang Cessna Caravan ng PCG, na nasa 200 talampakan lamang ang distansya.
Ayon kay Escalona, kasalukuyang pinag-aaralan pa ng DFA kung maghahain ng hiwalay na protesta ukol sa mga insidenteng ito.
Subalit, nananatili ang Pilipinas na bukas sa dayalogo at diplomatikong komunikasyon sa China.
