Tatalakayin sa nalalapit na Bilateral Consultation Mechanism (BCM) sa pagitan ng Pilipinas at China ang insidente ng banggaan ng dalawang Chinese vessels sa Bajo de Masinloc noong August 11. Kinumpirma ito ng Department of Foreign Affairs (DFA), kung saan ang Pilipinas ang magiging host sa nasabing pagpupulong ngayong taon.
Ayon kay DFA Secretary Theresa Lazaro, ang usapin hinggil sa bilateral ay palaging tinatalakay ang lahat ng may kaugnayan sa disputed waters.
Paliwanag niya na ang ganitong uri ng mekanismo ay nagsisilbing channel ng komunikasyon sa pagitan ng dalawang bansa upang mapanatili ang maayos na pag-uusap ukol sa mga isyung pinagtatalunan.
Matatandaan, nangyari ang banggaan mahigit isang linggo na ang nakalipas, na nagresulta sa pagkasira ng harapang bahagi o forecastle ng China Coast Guard Vessel 3104 matapos bumangga ito sa isang Chinese Navy warship.
Noong August 17 naman, nagsagawa ang mga barko ng Pilipinas, Australia, at Canada ng joint sailing malapit sa Lubang Island, Mindoro. Ang aktibidad ay bahagi ng Philippine-Australia Alon Military Exercises, na layuning palakasin ang katatagan at koordinasyon sa pagitan ng mga bansang kasali.
Ayon sa Philippine Navy, ang mga joint sailing tulad nito kasama ang mga kaalyadong bansa ay isang epektibong paraan upang mapigilan ang pananakot mula sa China at mapanatili ang seguridad sa West Philippine Sea at mga karatig nitong lugar.
