Nasabat ng mga tauhan ng Criminal Investigation and Detection Group (CIDG) ang tinatayang ₱329,250 halaga ng mga pekeng sigarilyo sa isinagawang operasyon sa Barangay Dapawan nitong Lunes, Hulyo 22.
Ayon sa ulat ng CIDG Romblon Provincial Field Unit, naaktuhan umano ang dalawang suspek na sina alyas John at alyas Arnold na may hawak na kahon-kahong sigarilyo na kanilang ibinebenta. Iba’t ibang brand ang nasamsam ngunit walang mga kaukulang BIR tax stamps at hindi rin sumusunod sa itinatakdang graphic health warning labels ng batas.
Sinabi ni CIDG Acting Director PBGEN Romeo Macapaz na ang operasyon ay bahagi ng patuloy na kampanya ng pamahalaan sa pagsusulong ng karapatang pangkalusugan ng publiko.
“With this accomplishment, we significantly protected the public from potential health hazards, reduce the harm caused by smoking, and ensure that the sale of these products to minors is strictly prevented,” pahayag ni Macapaz.
Kasalukuyang nakakulong ang mga suspek at nahaharap sa patong-patong na kaso kaugnay sa paglabag sa Tobacco Regulation Act at iba pang kaugnay na batas.
Pinuri rin ni Macapaz ang CIDG Romblon sa mabilis na aksyon na nagresulta sa pagkakakumpiska ng mga ilegal na produkto at pagkakaaresto ng mga lumalabag sa batas.
