Sapilitang inilikas sa iba’t ibang bayan sa lalawigan ng Romblon ang ilang pamilya matapos ang walang tigil na pag-ulan dulot ng pinalakas na habagat na pinalala pa ng Bagyong Emong na nasa loob ng Philippine Area of Responsibility (PAR).
Sa bayan ng Santa Fe, inilikas ang mga residente ng Barangay Pandan nitong umaga ng Biyernes, Hulyo 25, matapos bahain ang ilang bahagi ng lugar. Ayon kay Vice Mayor Cean Punzalan, kabilang sa mga nailigtas ay isang sanggol.
Sa Barangay Poblacion, tumulong din ang Municipal Disaster Risk Reduction and Management Office (MDRRMO) sa mga pamilyang naapektuhan matapos bahain ang mga lansangan dulot ng kombinasyon ng malakas na ulan at mataas na alon.
Pansamantalang isinara ang Rural Health Unit (RHU) ng Santa Fe matapos pasukin ng tubig-baha ang kanilang pasilidad. Gayunpaman, tiniyak ng RHU na bukas pa rin ang kanilang emergency hotline para sa agarang pangangailangang medikal at ambulansya.
Sa bayan ng Ferrol, tatlong pamilya o 12 katao ang inilikas noong Huwebes, kung saan dalawa sa mga pamilyang ito ay nananatili pa rin sa evacuation center, ayon sa MDRRMO head na si Kristal Gayle Badillo. Hindi pa pinapayagang bumalik ang mga ito sa kanilang tahanan dahil sa patuloy na masamang panahon.
Ayon sa Romblon Provincial Disaster Risk Reduction and Management Office (PDRRMO), nakaantabay na ang mga emergency response teams habang nagpapatuloy ang sama ng panahon. Patuloy ang panawagan ng mga lokal na opisyal sa mga residente na nasa mga delikadong lugar na manatiling alerto at sumunod sa mga abiso ng paglikas para sa kanilang kaligtasan.
