Labindalawang Persons Deprived of Liberty (PDL) ang matagumpay na nagtapos sa programa ng Department of Education (DepEd) Alternative Learning System (ALS) sa isang seremonya na ginanap sa makasaysayang Gabaldon Building ng Odiongan South Central Elementary School nitong Lunes.
Sa mga nagsipagtapos, lima ang pumasa sa Junior High School Accreditation and Equivalency Test, habang pito naman ang nakumpleto ang elementary-level ALS program.
May temang “Henerasyon ng Pagkakaisa: Kaagapay sa Bagong Pilipinas,” binigyang-diin ng programa ang kahalagahan ng pagkakaisa sa pag-abot ng pangarap ng bagong Pilipinas—isang mensaheng umuukit din sa mas malawak na inisyatibo ng Bureau of Jail Management and Penology (BJMP) MIMAROPA para sa ALS ngayong taon.
“Education is a beacon of hope even within these walls,” pahayag ni Jail Senior Inspector Dante Montilla, Acting District Warden. Ayon sa kanya, ang pag-aaral ay nagbibigay-daan sa mga PDL para makapagsimula muli nang may dignidad, layunin, at pagkakaisa.
Ipinamahagi sa seremonya ang mga diploma at certificate of completion bilang mahalagang hakbang tungo sa rehabilitasyon at pagbabalik sa komunidad.
Nakiisa rin sa selebrasyon ang mga lokal na guro at opisyal ng BJMP, na nagpahayag ng kanilang suporta sa dedikasyon ng mga nagsipagtapos.
Ayon kay BJMP Mimaropa Regional Information Officer Jail Officer 3 Joefrie Anglo, ipinakita ng pagtatapos na ito ang kapangyarihan ng edukasyon na magbago ng buhay, kahit sa loob ng mga piitan.
“The BJMP remains steadfast in its mission to provide learning opportunities that pave the way for genuine rehabilitation and successful reintegration into society,” ani Anglo.
Dagdag pa niya, patuloy ang layunin ng BJMP na palawigin ang mga ALS program sa buong rehiyon upang mas marami pang PDL ang makinabang at makapagbagong-buhay.
