Arestado ang isang 34-anyos na lalaki mula sa Barangay Tabing-Dagat matapos mahuli sa isang anti-illegal drug buy-bust operation na ikinasa ng Romblon Police Provincial Office nitong Miyerkules ng hapon, June 11.
Ayon sa ulat ng pulisya, nabilhan umano ng mga operatiba ang suspek ng isang sachet ng pinaghihinalaang shabu sa halagang P500. Agad na dinakip ng mga awtoridad ang lalaki matapos ang aktwal na transaksyon.
Bukod sa sachet na naging subject ng operasyon, nakumpiska rin umano mula sa suspek ang karagdagang limang sachet ng hinihinalang shabu, na may tinatayang kabuuang halagang P4,000.
Ang operasyon ay isinagawa ng pinagsamang puwersa mula sa Odiongan Municipal Police Station, Romblon Provincial Intelligence Unit, at Romblon Provincial Drug Enforcement Unit bilang bahagi ng pinaigting na kampanya ng PNP laban sa iligal na droga sa lalawigan.
Nakakulong na ang suspek at nahaharap sa kasong paglabag sa Republic Act 9165 o ang Comprehensive Dangerous Drugs Act of 2002.
