Isinama na ng Department of Social Welfare and Development (DSWD) ang mga bayan ng San Andres at Ferrol sa Tablas Island sa pilot implementation ng Tara, Basa! Tutoring Program ngayong summer break, ayon sa kinatawan ng DSWD MIMAROPA.
Nauna nang napili ang bayan ng Odiongan bilang pilot area, ngunit matapos ang konsultasyon sa mga lokal na pamahalaan, idinagdag ang San Andres at Ferrol dahil sa kanilang aktibong pakikilahok at kahandaang isulong ang programa.
“Actually, ang main po talaga ay Odiongan lang. Then, nung nagkaroon po ng further talks, parang mas engaged naman din po yung San Andres at Ferrol and open sila,” pahayag ni Lorraine Shaira Mae Intes, Project Development Officer II ng DSWD MIMAROPA sa Kapihan sa PIA Romblon.
Pumirma na sa memorandum of agreement ang DSWD, Romblon State University, at mga lokal na pamahalaan ng nasabing bayan para sa pormal na pagsisimula ng programa.
Ang Tara, Basa! ay isang community-based tutoring at literacy program na layong tugunan ang learning gap ng mga batang nahirapan sa pagbasa, habang binibigyan din ng oportunidad ang mga kabataan at magulang na kumita.
Tatanggap ng ₱430 kada araw ang mga college student na magiging tutor, habang ₱230 kada araw naman ang matatanggap ng mga magulang na sasanayin sa pamamagitan ng mga seminar at aktibong bahagi ng learning support.
Sa buong Romblon, inaasahang aabot sa 1,419 katao ang makikinabang, kabilang ang 126 tutors at 65 youth development workers. Sa bilang na ito, 772 magulang at estudyante ang mula Odiongan, 168 mula Ferrol, at 288 mula San Andres.
Kung maging maganda ang resulta ng programa sa Romblon, layon ng DSWD na mapalawak pa ang saklaw nito upang matulungan ang mas maraming kabataan at pamilya sa mga liblib na lugar.
