Inilalatag na ng Provincial Department of Health Office (PDOHO) sa Romblon ang mga hakbang para sa pagsisimula ng bagong primary care program ng Department of Health (DOH) na tinatawag na PuroKalusugan, katuwang ang iba’t ibang ahensya ng gobyerno at mga non-government organizations.
Sa isinagawang stakeholders’ forum sa bayan ng Odiongan kamakailan, hinimok ni PDOHO Romblon Provincial Director Dr. Winston Palasi ang pakikiisa ng lahat ng sektor upang matiyak ang matagumpay na pagpapatupad ng programa sa probinsya.
“Ang pagtutulungan at pagkakaroon ng kolektibong pananagutan ay susi upang mapabuti natin ang kalagayan ng kalusugan ng mga Romblomanon,” ani Dr. Palasi.
Dinaluhan ang forum ng mga kinatawan mula sa lokal na pamahalaan, iba’t ibang ahensya ng pambansang gobyerno, civil society groups, health professionals, at mga opisyal mula sa DOH regional office. Nagpahayag ang mga ito ng suporta sa pamamagitan ng logistical at technical assistance para sa programang ilulunsad sa mga susunod na buwan.
Sa sandaling maipatupad, magtutungo ang mga healthcare team sa mga liblib na barangay upang maghatid ng serbisyong medikal at magsagawa ng health information campaigns.
Ang PuroKalusugan ay layong magbigay ng tuloy-tuloy na serbisyong pangkalusugan sa antas ng purok, kabilang ang pagbabakuna, nutrisyon, kalinisan sa tubig at kapaligiran, kalusugan ng mga ina, TB at HIV screening, kaligtasan sa kalsada, mga sakit na hindi nakakahawa tulad ng altapresyon at diabetes, at paggamot sa kanser.
Bahagi ito ng pambansang adbokasiya sa ilalim ng “Bagong Pilipinas” framework ni Pangulong Ferdinand R. Marcos Jr., na layong mailapit ang mahahalagang serbisyo ng pamahalaan sa bawat pamilyang Pilipino, lalo na sa mga malalayong komunidad.
Inaasahang magiging mahalagang hakbang ang PuroKalusugan sa pagpapabuti ng kalusugan at kapakanan ng mga mamamayan sa lalawigan ng Romblon.
