Mariing pinabulaanan ng Odiongan Municipal Police Station ang isang viral social media post na nagsasabing may “white van” umano na nangharang at nang-abala sa isang motorista sa Barangay Budiong, Odiongan, dakong alas-dos ng madaling araw ng May 28.
Ang nag post na babae ay nagsabing hinarang umano ng isang puting van ang kanyang kapatid at inabala ito ng isang nakamaskarang sakay ng naturang sasakyan. Ang post ay mabilis na kumalat at nagdulot ng pangamba sa publiko.
Ayon sa opisyal na pahayag ng Odiongan PNP, agad silang nagsagawa ng imbestigasyon matapos matanggap ang impormasyon.
Sinabi ng mismong lalaking nakakita sa van na walang naganap na pananakot, harassment, o anumang ilegal na aktibidad.
Lumabas sa imbestigasyon na ang van ay nagmamaniobra lamang sa daan at hindi sinadyang harangin o takutin ang nasabing motorista. Dagdag pa rito, walang katotohanan ang ulat na may mga nakamaskarang sakay sa loob ng van.
Sinabi rin ng pulisya na ang takot ng biktima ay bunsod ng mga kumakalat na hindi beripikadong tsismis at hindi sa aktwal na kilos ng mga sakay ng naturang sasakyan.
Nanawagan ang Odiongan PNP sa publiko na agad iulat sa kanilang istasyon ang anumang kahina-hinalang insidente bago ito ibahagi sa social media.
Tiniyak ng kapulisan na patuloy silang magsisikap para sa kapayapaan at kaayusan ng bayan. Hinihikayat din nila ang publiko na maging kalmado, mapagmatyag, at responsable sa pagbabahagi ng impormasyon.
Para sa mga ulat o kahina-hinalang aktibidad, maaaring makipag-ugnayan sa Odiongan PNP sa kanilang opisyal na hotline o social media page.
