Sa darating na April 23–27, 2025 ay gaganapin ang National State Colleges and Universities Athletic Association Meet (SCUAA Games 2025) sa probinsya ng Camiguin. Lalahukan ito ng iba’t ibang unibersidad at kolehiyo mula sa buong Pilipinas, at kabilang sa mga sasabak ay ilang mga native Romblomanon student-athletes. Bilang suporta sa kanila, narito ang pagkilala sa mga kabataang atleta mula sa lalawigan ng Romblon.
Unang kinatawan mula sa Romblon ay ang Futsal Men’s Team ng Romblon State University (RSU) na binubuo nina Joseph Araque, Matthew Delos Reyes, Alvin John Araque, Josiah Francisco, Jomel Garachico, Rainiere Fernando, John Ralph Recto, Noeva Moaje, Jef Martinez, at Edgar Tumanon II. Tumatayong coach ng koponan si Dave John Gamol. Kasama rin sa delegasyon upang magbigay ng suporta ay sina RSU President Dr. Merian Catajay Mani at RSU Sports Director Ms. Alphee Latchica.
Ang RSU Futsal Team ay magiging kinatawan ng Region IV o STRASSUC matapos nilang dominahin ang regional meet na ginanap sa Puerto Princesa, Palawan. Upang mapalakas pa ang lineup, nagdagdag si Coach Gamol ng dalawang manlalaro mula sa University of the Philippines Los Baños: sina Kurt Aaron Austria at Austin Christian Saito.
Maliban sa RSU Futsal Team, may ilan pang mga Romblomanon student-athletes na lalahok din sa SCUAA Meet upang katawanin ang kani-kanilang eskwelahan. Isa na rito si John Paul Rico ng Cambajao, Cajidiocan, Romblon na kakatawan sa Rizal Technological University (RTU) sa mga event ng high jump, long jump, at triple jump. Mula rin sa RTU at bahagi ng Futsal Women’s Team ay si Maria Ludina Cervero Yap ng Gutivan, Cajidiocan, Romblon. Samantala, si Divine Mercy Galindo mula sa Danao, Cajidiocan, Romblon ay lalaban naman sa larangan ng Chess bilang kinatawan ng Polytechnic University of the Philippines (PUP).
