Naaresto ng mga awtoridad ang isang 49-anyos na lalaking kolektor ng Small Town Lottery (STL) sa isinagawang anti-illegal drug buy-bust operation sa Sitio Looban, Barangay Dapawan, hapon ng Huwebes.
Ayon sa ulat ng pulisya, isang operatiba ng pulisya ang nagpanggap na poseur-buyer at bumili umano ng isang sachet ng hinihinalang shabu mula sa suspek kapalit ng halagang P500.
Bukod sa sachet na nabiling ebidensya, nakuha pa umano mula sa suspek ang isa pang sachet ng hinihinalang ilegal na droga. Tinatayang aabot sa P4,000 ang kabuuang halaga ng mga nakumpiskang substansiya.
Isinailalim na sa pagsusuri ang mga ebidensya at ang suspek sa Romblon Provincial Crime Laboratory Office.
Samantala, pansamantalang nakakulong ang suspek sa Odiongan Municipal Police Station habang inihahanda ang mga kasong isasampa laban sa kanya.
Mahaharap ang suspek sa posibleng paglabag sa Sections 5 at 11 ng Article II ng Republic Act 9165 o ang Comprehensive Dangerous Drugs Act of 2002.
