Arestado ang isang 20-anyos na lalaki matapos hatawin ng dos-por-dos na kahoy at bakal ang kanyang sariling ama sa kanilang tahanan sa Barangay Poblacion, bayan ng San Andres madaling araw ng Linggo.
Ayon sa ulat ng San Andres Municipal Police Station, kinilala ang suspek na si Roshua Rizano, 20, na umano’y nasa ilalim ng impluwensya ng alak at nagwala sa kanilang bahay dahil sa pagiging “brokenhearted.” Sinubukan siyang pakalmahin ng kanyang ama na si Rodolfo Rizano, ngunit bigla siyang nagalit, kumuha ng dos-por-dos na kahoy, at pinalo ito sa ulo ng kanyang ama.
Hindi pa nakuntento ang suspek at muling kumuha ng bakal, na ipinalo rin sa ulo umano ng matanda. Bukod pa rito, nagtangka rin umano itong gumamit ng spear gun upang saktan ang ama, ngunit nakatakas ang biktima bago pa ito matamaan.
Agad namang isinugod sa San Andres Municipal Hospital ang matanda upang gamutin ang tinamong sugat sa ulo. Samantala, agad namang naaresto ng mga rumespondeng pulis ang suspek, kasama ang mga ginamit nitong sandata sa insidente.
Kasalukuyang nakakulong ang suspek at posibleng masampahan ng kasong frustrated parricide.
