Sugatan ang isang magsasaka matapos itong mataga habang nakikipag-inuman sa suspek at sa mga kaiban nito nitong gabi ng Biyernes.
Ang biktima, kinilalang si alyas A, 59, habang ang suspek naman ay si alyas R, 53, pawang mga residente ng Sitio Cajil, Barangay Pag-alad, San Andres, Romblon.
Sa ulat ng San Andres Municipal Police Station, habang nag-iinuman ang grupo ng biktima at suspek, bigla umanong nagtalo ang dalawa sa hindi pa tukoy na rason. Walang anu-ano ay bigla di umanong tinaga ng suspek ang biktima sa leeg.
Agad namang naisugod ang biktima sa San Andres Municipal Hospital at kalaunan ay inilipat sa Romblon Provincial Hospital para sa mas masuri.
Samantala, ang suspek ay naaresto naman ng mga rumespondeng pulis. Nakakulong na ngayon ito at posibleng maharap sa kasong frustrated homicide.
