Nagdulot ng landslide at pagbitak ng lupa sa Barangay Dulangan, Magdiwang, Romblon ang patuloy na pag-ulan na dala ng shear line noong Martes, Enero 14,. Bukod dito, malalaking bitak sa kalsada ang naiulat sa lugar, na nagdulot ng panganib sa mga motorista at residente.
Ayon sa Municipal Disaster Risk Reduction and Management Office, ang nasabing landslide ay tutugunan agad kapag nabigyan na ng clearance ang backhoe loader na ligtas nang dumaan sa kalsada dahil mataas din ang tubig sa tulay.
Patuloy na iniinspeksyon ng mga opisyal ng barangay at MDRRMO ang mga apektadong lugar upang masiguro ang kaligtasan ng mga residente at upang matugunan ang posibleng karagdagang pinsala.
Sa gitna ng panganib, pinaalalahanan ang mga residente na manatiling alerto at iwasan ang mga posibleng high-risk areas, lalo na’t patuloy ang pag-ulan. Ang shear line, na siyang nagdulot ng matinding pag-ulan, ay maaaring magresulta pa ng pagbaha at pagguho ng lupa sa iba pang bahagi ng Magdiwang.
