Patay ang isang 26-anyos na lalaki sa Sitio Pagatpat, Barangay Doña Juana, San Agustin, Romblon, matapos itong pagsasaksakin ng isang 22-anyos na suspek noong gabi ng Disyembre 16.
Ayon sa ulat ng San Agustin Municipal Police Station, naglalaro ang biktima ng Mobile Legends kasama ang kanyang mga kaibigan sa isang kubo malapit sa kanilang bahay nang biglang dumating ang suspek. Walang pasabi, agad na inatake at pinagsasaksak ang biktima.
Nagtamo ng malalalim na sugat sa iba't ibang bahagi ng katawan ang biktima, na sinubukang dalhin sa Tablas Island District Hospital. Gayunpaman, idineklara siyang dead on arrival.
Agad namang tumakas ang suspek matapos ang krimen ngunit naaresto ng mga pulis sa isinagawang hot pursuit operation. Hindi na narekober ang ginamit nitong patalim sa pananaksak.
Sa kasalukuyan, nakakulong na ang suspek at nakatakdang sampahan ng kasong murder.
