Naospital ang isang lalaki sa bayan ng San Andres matapos itong masaksak ng nakaalitan niya sa gilid ng kalsada sa Barangay Poblacion nitong gabi ng April 2.
Ang biktima ay kinilalang si Marlon Galindez, 30, habang ang suspek naman ay si Virgil Musico, 44.
Sa ulat ng Romblon Police Provincial Office, nag-iinuman ang suspek at ang kanyang live-in partner sa gilid ng kalsada nang dumating ang biktimang nakainum na rin nang oras na iyon.
Nagkaroon umano ng pagtatalo ang dalawa hanggang sa sinuntok ni Galindez si Musico sa mukha dahilan para mas lumaki ang away ng dalawa. Habang nag-susuntukan ay bigla umanong bumunot si Musico ng kutsilyo at sinaksak si Galindez sa tiyan at sa kamay.
Tumakbo naman agad ang biktima papunta sa mga nakatambay rin sa lugar para humingi ng tulong na dalhin siya sa SSan Andres Municipal Hospital.
Ang suspek naman ay nahuli ng mga tauhan ng San Andres Municipal Police Station sa isinagawang hot pursuit operation laban dito. Nakakulong na ngayon ang suspek at mahaharap sa kasong frustrated homicide.
