Isang lalaki ang idineklarang dead on arrival sa San Andres Municipal Hospital at dalawa naman ang nasugatan matapos magsalpukan ang isang motorsiklo at tricycle sa kahabaan ng national road sa Sitio Lantangan, Brgy Agpudlos, San Andres, Romblon.
Sa inisyal na ulat ng San Andres Municipal Police Station sa pamumuno ni Police Major Elvis Galicia, nakasaad na gabi ng January 22 nang mangyari ang malagim na aksidente.
Patungo umano ng Calatrava ang tricycle o garong na minamaneho ni Norlie Lorilla Dela Cruz, 40, kasama ang dalawang angkas, para sana mamili ng isda ngunit nakasalpukan nila ang rider na si Simon Cahilig Gadon na patungo naman ng San Andres.
Si Gadon ay sinubukan pang isugod sa ospital ngunit idineklarang dead on arrival matapos magtamo ng pinsala sa ulo.
Patuloy ang imbestigasyon ng San Andres Municipal Police Station sa nasabing aksidente.
