Pinasalamatan ng DOH-CHD-Mimaropa ang mga ahensiyang kasapi sa Mimaropa Regional Vaccination Operations Center o Mimaropa RVOC at mga kabalikat na lokal na pamahalaan sa kanilang pagsisikap na mabakunahan ang mga kababayan sa rehiyon.
Sa pulong-balitaan kahapon, Ipinarating ni DOH-CHD Mimaropa Regional Director Mario S. Baquilod ang aniya'y ‘pagtanaw ng utang ng loob' ng regional office sa mga LGU at RVOC members kasunod ng paggawad ng parangal ng National Task Force on Covid 19 sa Mimaropa RVOC noong Hunyo 20.
Pinarangalan ang Mimaropa RVOC dahil sa natatangi nitong istratehiya sa paghahatid ng bakuna sa mga malalayo't mahirap puntahang lugar.
Ang pagkilala sa Mimaropa RVOC ay nilagdaan nina Presidential Adviser for Covid-19 Response at Deputy Chief Implenenter Vince Dizon, OPAPP Secretary at Chief Implenter and Vaccine Czar Carlito Galvez Jr. at Health Secretary Francisco Duque III (LP)
