Naipaliwan na ang may aabot sa dalawampung pamilya sa Sitio Lumandong sa Limon Norte, Looc, Romblon sa tulong ng prorama ng Tablas Island Electric Cooperative (TIELCO) at ng National Electrification Administration (NEA).
Hindi mapagsidlan ang saya sa puso ng mga residente ng Sitio dahil ang matagal na nilang panalangin ay naisakatuparan na.
Ayon kay Rene Coching, isa sa mga nakatira sa sitio, ay napakalaking tulong ang nasabing pagkakaroon ng kuryente sa kanilang lugar dahil tiyak na makakatulong ito sa pag-aaral ng mga kabataan doon.
Naging matagumpay ang Energization Ceremony na isinagawa ng TIELCO noong March 23 sa ikaapat na BAPA na maipailawan sa pamamagitan ng Sitio Electrification Program (SEP) ngayong taon.
Samantala, nanumpa sa katungkulan ang mga opisyales ng Barangay Power Association (BAPA) Lumandong sa harap ni Mayor Lisette M. Arboleda.
Nangako ang mga opisyales ng BAPA Lumandong na paghuhusayan ang tungkuling nakaatang sa kanila para sa ikakaunlad ng kanilang asosasyon at sa ikabubuti ng kanilang sitio.
