Politika ang nakikita ng kampo ng alkalde ng Ferrol, Romblon sa naganap na raid sa Tubigon Square Garden noong Linggo na nagresulta sa pagka-aresto ng alkalde at ng halos 200 katao dahil sa paglalaro ng sabong.
Sa isang text message na pinadala nito sa Romblon News Network nitong Martes, sinabi ni Mayor Jovencio Mayor Jr., na ‘for political reason' kung bakit nagsagawa ng raid ang CIDG sa lugar.
Paliwanag nito, ang bayan ng Ferrol ay unang bayan sa probinsya ng Romblon na nakaabot sa herd immunity matapos mabakunahan ang may mahigit 70% na mga residente sa lugar laban sa Covid-19.
Ito umano ang dahilan kung bakit pinayagan nito ang kahilingan ng mga kababayan nitong magsagawa ng laro noong Linggo.
Dagdag pa nito, mababa na ang Covid-19 transmission sa bayan at kinokonsidera nang low-risk municipality.
Katunayan pa umano nito, noong nakalipas na semana ay nagpasa na ang League of Municipalities of the Philippines – Romblon ng resolusyon para imungkahe sa IATF na ibaba ang alert level system ng probinsya.
“But despite all of this, the CIDG arrested all the individuals inside the cockpit arena even though there was no actual cockfighting as I previosly stopped the activity,” pahayag ng alkalde.
“In short, ng dumating ang CIDG, wala ng laban at ang mga tao ay isa-isang umuuwi na at ang nakalabas na ng sabungan ay pinapasok ulit sa sabungan daladala siyempre ‘yung mga manok nila,” dagdag pa ng alkalde.
Wala pang sagot ang CIDG-Romblon kaugnay sa mga pahayag na ito ng alkalde pero nauna nang sinabi ni Polie Brigadier General Sidney Hernia, Regional Director ng Police Regional Office Mimaropa, na ang aktibidad ay paglabag sa IATF guidelines.
