Nilinaw ng Department of Health Center for Health and Development (DOH-CHD)-Mimaropa na nananatiling ligtas sa pinangangambahang sakit na 2019 Novel Coronavirus (nCoV) ang buong rehiyon na kinabibilangan ng Mindoro Occidental at Oriental, Marinduque, Romblon at Palawan.
Ito ang binigyang-diin ni DOH-Mimaropa Regional Director Mario Baquilod sa isinagawang ‘Kapihan sa Philippine Information Agency (PIA)-Palawan kahapon.
“Wala po tayong dapat ikabahala dito sa rehiyon natin, at dito sa Palawan, sapagkat wala pa tayong kumpirmadong nCoV, bagamat mayroon tayong isang person-under-investigation (PUI), hindi po tayo dapat mag-panic dahil naka-isolate ito sa ating hospital facility,” ani Baquilod.
Kanila rin aniyang binisita ang pasyente sa Ospital ng Palawan (ONP), at hihintayin pa nila ang pinakahuling resulta sa 2019-nCoV bago pauuwiin ang mag-anak.
“Nag negative sa SARS virus ang 10-year-old girl, positive naman sa ibang mga bacterial organisms, hinihintay pa talaga natin ang result ng sa nCoV at bukas (Biyernes) makukuha na. Ang nakita sa mga naunang test ay common bacteria na nagdadala ng mga usual na nararamdamang ubo at sipon,” ito naman ang naging paliwanag ni Noel Orozco ng Regional Epidemiology Surveillance Unit.
Sinabi naman ni Dr. Ma. Vilma Diez, assistant regional director ng DOH – Mimaropa na ang kinakailangang gawin sa ngayon ay umiwas sa sakit sa pamamagitan ng palagiang paghuhugas ng kamay gamit ang tubig at sabon o alcohol, malusog na pamumuhay, gamitin ng tama ang isinusuot na mask, lutuin nang husto ang pagkain, at iwasan munang makipag-beso-beso o makipag-kamay sa mga makakasalamuha.
“Ang 2019 nCoV ay isang respiratory illness, na maaaring makuha o mailipat sa pamamagitan ng bibig, ilong at mata. Ang transmission ng virus ay maiiwasan sa pamamagitan ng pagtatakip ng bibig kapag umuubo, tamang paghuhugas ng kamay, hindi kinakailangang lahat ay naka-mask, kung wala namang panggagalingan ng virus na makakahawa. Gawin ang 20 segundo na paghuhugas ng kamay o pag -a-alcohol. May tamang pagsusuot ng face mask, kapag may sakit, ang blue side ang nasa labas, kapag walang sakit ang magsusuot at nais mo lang na ‘di mahawa ng virus, ilalabas ang white, blue sa loob,”paliwanag naman ni Romalyn Racho ng DOH-CHD na ipinakita pa ang aktuwal at tamang pagsusuot ng mask.
Bukod sa mahigpit na pagbabantay at pagpapatupad ng preventive measure sa paliparan ng Puerto Princesa at maging sa pantalan kung saan mayroong mga dumadaong na cruise ship, pinulong din ni Baquilod ang mga Municipal Health Officers (MHO), hepe ng mga pribado at pampublikong ospital sa lungsod at lalawigan.
“Pag-uusapan namin lalo na ng mga MHOs at mga pamunuan ng ospital sa mga lugar na malapit sa mga tourism areas na i-improve ang kanilang kakayanan na humawak o tumanggap ng mga pasyenteng may katulad na sintomas ng nCoV,” ani pa ng direktor.
Ginagalang naman ng DOH ano man ang maging desisyon ng lokal na pamahalaan na payagan pa rin ang biyahe ng cruise ship o direct flight mula Taiwan, Hong Kong at South Korea, subalit kinakailangan lamang dumaan ang mga pasahero sa quarantine protocol.
Ayon kay Diez, kung walang thermal scanner sa port area ng lungsod, mayroon silang diagnostic tool, na kasama sa interim guidelines ng DOH, at dapat sundin nang husto ang proseso, maging sa kung ano ang mga dapat isuot ng mga taong nasa frontline services.
Samantala, sakaling magkaroon ng positibong kaso ng 2019-nCoV, tiniyak ng pamunuan ng ONP na handa ang kanilang pasilidad. Ayon kay Dr. Melecio Dy, hepe ng ONP, kayang tumanggap ng apat na pasyente ang kanilang isolation room sa ngayon, at maaari pa nila itong i-adjust kung kinakailangan. (Leila B. Dagot/PIAMIMAROPA-Palawan)
