Patay na ng matagpuan ng isang mangingisda ang isang lalaking lumulutang sa ilog sa Magdiwang, Romblon nitong umaga ng Huwebes, September 26.
Ayon sa ulat ng Magdiwang Municipal Police Station, bandang alas-9 ng umaga patungo sana ng dagat para mangisda si Rudy Rodeo nang makita nito ang walang buhay na katawan ng isang lalaking kinilalang si Aldo Ribon Fajanilan, 51 anyos, residente ng Barangay Tampayan.
Sa imbestigasyon ng pulisya, nakikipag-inuman si Fajanilan sa bahay nina Barlito Mendoza noong araw na iyon ngunit nagpaalam na uuwi na. Dahil ang ang bahay ni Fajanilan ay nasa kabilang bahagi ng Pawala River, kinailangang lumangoy ni Fajanilan papunta rito at dito na siya nalunod.
Dinala sa Magdiwang Rural Health Unit ang katawan ni Fajanilan ngunit idineklara na siyang dead on arrival.
Wala naman umanong nakitang palatandaan ng foul play sa pagkakalunod kay Fajanilan.
