Hinihikayat ng Department of Health – Romblon ang mga magulang na hindi pa napapabakunahan ang kanilang mga anak kontra tigdas na dalhin na sa pinakamalapit na barangay health centers o rural health centers ang kanilang mga anak para mabigyan ng bakuna dahil hindi naman umano ito katulad ng Dengvaxia.
Ito ang sinabi ni ni Ralph Falculan ng DOH-Romblon nang makapanayam ng mga mamahayag sa ginanap na Kapihan sa PIA Romblon nitong Lunes, February 18.
Ayon kay Falculan, libreng magpaturok kontra tigdas sa mga barangay health centers, rural health centers, o di kaya sa Public Hospital.
“Ang mga midwifes, at nurses na nasa barangay health centers ay trained sa pagututurok ng bakuna kontra tigdas,” pahayag ni Falculan.
Priority umanong mabakunahan ng Department of Health ang mga batang edad anim na buwan hanggang limang taon dahil sila umano ang mabilis na tamaan ng measles o tigdas.
Maari rin umanong magpabakuna ulit ang mga mas mataas ang edad, at ito ay ituturing umanong booster ng bakuna.
Noong nakaraang taon umano ay 70% lang umano ng target nilang mababakunahan ang nabigyan ng bakuna kontra tigdas dahil umano sa ilang factors katulad ng pagkatakot ng mga magulang sa dengvaxia, hindi pagpayag ng mga magulang na pumirma sa waiver, at iba pa. Kung susumuhin umano, halos 3,000 pa umanong bata sa buong lalawigan ang hindi pa nababakunahan ng bakuna kontra tigdas.
“May mga ready na tayong vaccine sa lahat ng barangay sa Romblon, sapat ang gamot ng probinsya [para dito sa tigdas],” pahayag ni Falculan.
Ilan umano sa mga sintomas ng tigdas ay lagnat, pag-ubo, pamumula ng mata, pagtatae, at rashes.
Ang tigdas o measles ay posibleng makamapatay kung sakaling magkaroon ng komplikasyon ang pasyenteng tinamaan ng nasabing sakit.
Related Article: DOH-Romblon, binabantayan ang 8 pasyenteng pinaghihinalaang may Tigdas
