Nakaalarma umano ang pagtaas ng mga naitatalang kaso ng human immunodeficiency virus o HIV sa lalawigan ng Romblon ayon sa isang tauhan ng Department of Health (DOH) – Romblon.
Ayon kay Ralph Falculan, Public Health Nurse ng DOH-Romblon, ng makapanayam ng mga lokal na mamahayag sa ginanap na Kapihan sa Philippine Information Agency (PIA) – Romblon nitong Lunes, March 19, simula umano 1984 hanggang 2017 ay nakapagtala na ang Romblon ng 26 na kaso ng may human immunodeficiency virus.
Ang pinakamaraming may naitalang bilang na may HIV ay noong 2017 kung saan umabot sa 5 katao ang na diagnose sa nasabing sakit.
“Sa study po ng virus na HIV, hindi po yan nabubuhay sa labas ng tao, talagang sa sexual ang pinaka-mode ng transmission nito at sa blood transfussion,” paliwanag ni Falculan sa mga mamahayag.
Sinabi pa ni Falculan na ang mga bayan ng Romblon at Odiongan ang mga lugar sa lalawigan na may pinakamaraming bilang ng kaso ng human immunodeficiency virus.
“Ang nakaktakot rito ay pabatang pabata ang mga may sakit kung saan 23-year old ang mean age o average, habang ang pinakabata naman ay edad 15 at pinakamatanda ay edad 50 pataas,” pahayag pa ni Falculan.
Patuloy naman ang ginagawang kampanya ng Department of Health – Romblon sa pakikipagtulungan ng Provincial Health Office para masigurong hindi na dadami ang mga may sakit na may HIV.
Ayon sa Department of Health – Romblon, libreng mag pa-test ang lahat sa Social Hygiene Clinic sa Rural Health Unit ng Odiongan para masigurong ligtas at wala silang sakit na HIV o di kaya’y maagapan at hindi mauwi sa acquired immune deficiency syndrome (AIDS) na pwedeng ikamatay.
Ang isa umano sa pinaka the best na paraan para maiwasan ito ay ang pagsisiguro na tapat tayo sa ating mga asawa at hindi na nakikipagtalik sa iba.
