Naglabas ng saloobin si Cajidiocan Councilor Marvin Greggy Ramos, kasalukuyang Chairman ng Committee on Sports, sa Facebook kaugnay sa di-umanoy kulang na suporta ng Provincial Government sa Munisipyo ng Cajidiocan na magho-host ng Provincial Athletic Meet 2017 ngayong Disyembre 10 hanggang 16.
Tanong ni Ramos sa kanyang Facebook Post, nasaan umano ang suporta at tulong ng probinsya ng Romblon?
Sa panayam ng Romblon News Network kay SB Ramos, sinabi nito na hiling lang umano nila [kasama ang mga guro, barangay officials, at lgu officials] sa probinsya ay ang maipaayos sana ang mga sports facilities ng bayan katulad ng Volleyball Court bago magsimula ang palaro.
Matagal na rin umano itong alam ng Division Office ng Department of Education at ng ilang Sangguniang Panlalawigan Members na dumalaw sa bayan ng Cajidiocan nitong mga nakaraang buwan ngunit hanggang ngayon umano ay wala silang natatangap na tawag o balita.
“Yun lang naman yung request namin, pero sa ngayon, ginawan nalang namin ng paraan at sinabi na ni Congressman Emmanuel Madrona sa pakikipagtulungan ni Atty. Budoy Madrona na sila na ang magpapaayos ng volleyball court,” ayon kay Ramos.
“Hindi naman kami namumulitika rito, ang amin lang naman ay sana makamusta rin kami,” dagdag ni Ramos.
“Anticipated na rin natin ang Provincial Athletic Meet taon-taon sana budgetan nalang ito ng probinsya para hindi mahirapan ang mga magho-host ng palaro sa mga susunod na taon lalo na yung mga mahihirap na munispyo na hindi kaya ng budget ang pagsasaayos ng mga pasilidad,” ayon kay Ramos.
Naiintidihan rin naman umano ni SB Ramos kung na-busy si Governor Eduardo Firmalo sa MIMAROPA Festival pero sana umano ay mapansin rin umano sila.
Governor Firmalo's reply about the issue
Sa isang panayam ng Romblon News Network, sinabi ni Governor Eduardo Firmalo na hindi nila pinababayaan ang Cajidiocan, katunayan umano nito ay ang paglaan ng probinsya ng P800,000 budget para sa pagsaayos ng mga bleachers, at pag-pantay ng mga lupang pagdadausan ng mga laro.
Nagbigay rin umano ang probinsya ng budget ngayong 2017 para sa Food Court ng Cajidiocan, ilang road projects sa mga barangay nito, classrooms sa isang elementary, at isang evacuation center.
Nagbigay rin umano sila ng budget para sa Provincial Athletic Meet at ito ay kasama sa Special Education Funds ng Department of Education – Romblon ngayong taong 2017.
Humingi naman ng pasensya si Governor Eduardo Firmalo kung hindi nito nasagot ang tawag ni Mayor Nicasio Ramos nitong kasagsagan ng MIMAROPA Festival 2017 dahil sa dami ng kanyang meetings at appointments.
Samantala, sinabi ng Provincial Engineering Office na wala silang natatangap na sulat o request galing sa Cajidiocan kaugnay sa pagsesemento ng volleyball court na hiling ni SB Ramos.
Wala pang pahayag ang Department of Education – Romblon kaugnay sa nasabing issue.
