by Paul Jaysent Fos, Romblon News | Thursday, 12 November 2015
Makakatangap na ng ayuda ang mga benepisyaryo ng programa ng Department of Social Welfare and Development (DSWD) na Pantawid Pamilya Pilipino Program ngayong November matapos ang halos ilang buwan na delay sa pagrelease ng cash grants.
Ayon sa text message na pinadala sa Romblon News ni Jomel Fillartos, Grievance Officer ng DSWD-Romblon, ngayong Nobyembre ay makakatangap na ang lahat ng munisipalidad ng ayuda para sa Period 4 o para sa buwan ng August at September.
“Hindi na po LBC ang mag-papayout sa halip ay yung Arya na po na Cooperative ng Calatrava na miyembro ng Smart-NATCCO.” pahayag ni Fillartos.
Ang nasabing pagpalit ng conduit ay matapos na magkaproblema sa pagrelease ng cash grants ang LBC Express na naging resulta ng pagka-delay sa paglabas ng pera.
Samantala, ayon kay Fillartos ang ayuda para sa P3 o Period 3 ay LBC Express parin ang magbibigay sa mga miyembro ng 4Ps at inaantay nalang umano nila ang schedule kung kelan sila magbibigay.
“Sa pag release ng P4 na kung saan ang magbabayad ay Arya, kasama po na irerelase yung mga unpaid grant this year, yun po yung mga no shows natin at mga nakahold.” pahayag ni Fillartos.
Sinabi naman ni Fillartos na walang katotohanan ang mga kumakalat na bali-balitang pinapipirma ng mga taga-DSWD ng payroll ang mga benpisyaryo ng 4Ps sa ilang bayan sa Tablas Island.
Hindi umano ito pwede mangyari kasi hindi lang isang beses sila pipirma sa payroll dahil kailangan rin umano nilang pumirma sa merchant at Acknowledgement Reciept na patunay na nakatanggap sila ng pera.
“Napaka imposible na magrelease ng payroll ang LBP o merchant na walang pera at if mapirmahan man lahat yun ng bene[pisyaryo] hindi yun makukuha kasi pipirma pa siya ng A.R. or Acknowledgement [Receipt] na nagpapatunay na nareceive niya nga ang pera.” sabi ni Fillartos.
