by Paul Jaysent Fos, Romblon News | Thursday, 15 October 2015
Muntik nang magahasa ang 21-taong gulang na estudyante ng Romblon State University Main Campus kaninang madaling araw sa tinutuluyang boarding house sa Barangay Liwanag sa bayan ng Odiongan.
Ayon sa kwento ng biktima sa imbestigador ng Women and Child Protection Desk ng Odiongan Municipal Police Station, pasado alas-4 umano ng hapon ng magising ang biktima dahil sa ingay na gawa ng suspek habang pinapasok ang kwarto ng biktima.
Dagdag pa ng biktima, nakatakip umano ng panyo ang mukha ng suspek ng pasukin ang kwarto niya.
Sinabi rin ng biktima na tinutukan umano siya ng kutsilyo ng suspek na kinilala niyang si Lemuel Lorenzo, may-ari ng tinutuluyang boardhouse kaya hindi siya nakasigaw agad ng tulong. Ngunit habang hinahawakan ng suspek ang tiyan ng bitkima na akmang gagahasain na siya ay nahablot niya ang kutsilyo at sumigaw ng tulong.
Agad namang nagkaripas ang suspek papunta sa bintanang dinaanan nito.
Agad na hinuli ang suspek ng mga kapulisan at dinala sa presento upang imbestigahan.
Itinanggi naman ng suspek nang makausap ng Romblon News na siya ang suspek na nagtangkang manggahasa sa biktima.
Maaring maharap sa kasong attempted rape ang nasabing suspek.
