by Paul Jaysent Fos, Romblon News | Tuesday, 29 September 2015
Pinangunahan ng Department of Environment and Natural Resources – Romblon ang ika-30 na pagdiriwang ng International Coastal Clean-up (ICC) Celebration sa bayan ng Odiongan ngayong araw, September 29.
Nagkaisa ang mga estudyante at guro ng mga paaralan sa bayan ng Odiongan kasama na ang mga empleyado ng Gobyerno local man o national at ilan pang environmental groups sa pagdiriwang ng ICC. Nakiisa rin ang mga miyembro ng Pantawid Pamilya Pilipino Program ng Department of Social Welfare and Development sa nasabing aktibidad.
Umabot sa mahigit 1,000 katao ang naki-isa sa nasabing aktibidad.
Naglinis sila sa lahat ng coastal area ng mga coastal barangay sa buong Odiongan kasama na ang Barangay Canduyong, Budiong, Tabin-Dagat, Ligaya, Poctoy, Batiano, Gabwan, Libertad at Panique.
Layunin ng programa na mapanatili ang kalinisan ng paligid ng karagatan na sakop ng nasabing bayan at tulong na rin sa pagbabalik ng kagandahan ng kalikasan.
Maliban sa selebrasyon ng ICC, ngayong buwan rin ginugunita ang National Clean-up Month sa pamamagitan ng Proclamation No. 244 na pinirmahan ni President Fidel Ramos noong 1994.
