Pinakawalan na sa likas nitong tirahan ang isang 2.5 metrong reticulated python na tumitimbang ng humigit-kumulang walong kilo matapos itong marekober ng Department of Environment and Natural Resources (DENR) sa Romblon.
Ayon sa Provincial Environment and Natural Resources Office (PENRO) Romblon, isinagawa ang pagpapakawala sa ahas sa CALSANAG Watershed Forest Reserve sa Barangay Balogo, Calatrava, Romblon, nitong Miyerkules, Oktubre 21.
Unang isinuko sa DENR ng San Agustin Municipal Police Station ang sawa matapos itong matagpuang nakulong sa kulungan ng manok ng isang residente.
Nakatakas ang ahas mula sa pansamantalang kulungan nito ngunit kalaunan ay narekober din. Matapos suriin ng mga tauhan ng DENR, napag-alamang nasa maayos itong kondisyon at maaari nang ibalik sa natural nitong tirahan.
Nagpasalamat ang PENRO Romblon sa publiko at mga katuwang na ahensya sa pakikipagtulungan upang matiyak ang ligtas na paghawak at pagpapakawala sa hayop.
Pinayuhan naman ang publiko na iulat sa pinakamalapit na tanggapan ng DENR ang anumang pagkakita o pakikipagtagpo sa mga ligaw na hayop. Nagbabala rin ang ahensya na huwag lapitan o tangkaing hulihin ang mga ito upang maiwasan ang panganib.
