Umaasa si Romblon Mayor Atty. Gerald Montojo na maibalik sa mga maliliit na mangingisda ang eksklusibong karapatan sa municipal waters ng kanilang bayan sa pamamagitan ng pagbabaligtad ng Korte Suprema sa nauna nitong desisyon sa kasong may kaugnayan sa Bersidar Corporation.
Sa kaniyang talumpati sa Third Philippine Small-Scale Fisheries National Symposium na ginanap sa Batangas State University nitong Oktubre 21, sinabi ni Montojo na hinihintay nila ang desisyon ng Korte Suprema sa kanilang motion for reconsideration kaugnay ng kaso.
“So, we cross all our fingers for prayers na sana baliktarin ng Supreme Court ’yong kaso na ’yan at ibalik sa atin ang kinse na ’yan,” pahayag ni Montojo.
Kinuwestiyon ng alkalde ang proseso ng paglilitis sa Regional Trial Court sa Malabon dahil hindi umano naisama bilang mga partido sa kaso ang mga lokal na pamahalaang posibleng maapektuhan ng desisyon. Ayon sa kaniya, nalaman lamang ng kanilang munisipalidad ang kaso matapos makapaglabas ng desisyon ang Korte Suprema.
Bilang hakbang sa pangangalaga ng kanilang katubigan, nagpasa ang lokal na pamahalaan ng Romblon ng ordinansang nagdedeklara sa buong 15-kilometrong municipal waters nito bilang protected area. Layunin nitong palakasin ang proteksiyon sa yamang-dagat at kabuhayan ng mga komunidad na umaasa sa pangingisda.
Ang Romblon ang kabisera ng lalawigan at isang third-class municipality na napapalibutan ng katubigan. Mayroon itong 14 marine protected areas, gayundin ang mga mangrove sanctuary, pawikan sanctuary at wild bird sanctuary.
Noong 2017, kinilala rin ang Romblon bilang kampeon sa programang Malinis at Masaganang Katubigan (MMK) ng Bureau of Fisheries and Aquatic Resources (BFAR) MIMAROPA.
Sa kanyang talumpati, nanindigan din si Montojo na ipagpapatuloy nito ang pagprotektao sa municipal waters hanggang matapos ang termino nito sa 2028 para masigurong may lugar na pupuntahan ang mga maliliit na mangingisdang Romblomanon.
