Hinimok ng Coast Guard Station Romblon at mga nasasakupan nitong sub-station ang publiko na unahin ang kaligtasan at maghanda sa posibleng epekto ng Super Typhoon “Rosal.”
Bilang bahagi ng paghahanda, namahagi ang Coast Guard ng mga information flyer sa mga komunidad upang ipaalam ang mahahalagang paalala sa kaligtasan, partikular sa mga umaasa sa karagatan para sa kabuhayan at paglalakbay.
Pinayuhan ang mga mangingisda, operator ng bangka at pasahero na subaybayan ang mga opisyal na abiso ng PAGASA, tiyaking nasa maayos na kondisyon ang kanilang mga sasakyang-dagat, at iwasang pumalaot kung mapanganib ang lagay ng panahon at karagatan.
Ayon sa Coast Guard Station Romblon, patuloy nitong minomonitor ang kondisyon ng karagatan sa nasasakupan nitong area of responsibility upang makatulong na mapanatili ang kaligtasan ng publiko.
Hinimok din ang publiko na manatiling alerto at sumunod sa mga abiso ng mga awtoridad sa harap ng banta ng masamang panahon.
