Inatasan ni Pangulong Ferdinand R. Marcos Jr. ang Department of Health (DOH) na paigtingin ang information campaign hinggil sa banta ng Super El Niño at mga posibleng epekto nito sa kalusugan, ayon kay Health Secretary Dr. Edwin Mercado nitong Lunes.
Sa press briefing sa Malacañang, sinabi ni Mercado na inatasan ng Pangulo ang DOH na palawakin ang pagbibigay ng impormasyon at hindi lamang umasa sa mga poster at advisory.
Kabilang dito ang pagmomobilisa sa mga barangay health worker upang magsagawa ng house-to-house information campaign at ipaliwanag sa mga residente ang mga hakbang upang maiwasan ang mga posibleng epekto ng El Niño.
“Tayo nga po ay inatasan ng Pangulo na gumawa ng mga information campaigns hindi lamang po mga posters kundi to reach out, even magbahay-bahay ang ating barangay health workers upang ipaliwanag iyong mga kailangang gawin para maiwasan ang implikasyon ng El Niño,” ani Mercado.
Kaugnay nito, pinayuhan ng DOH ang publiko na iwasan ang matagal na pagkabilad sa direktang sikat ng araw, regular na magpahinga kapag nagtatrabaho sa labas, at uminom ng anim hanggang walong basong tubig kada araw.
Partikular na binigyang-pansin ng DOH ang panganib ng heat stroke at dehydration dahil sa matinding init, lalo na sa mga taong matagal na nananatili o nagtatrabaho sa labas.
Minomonitor din ng ahensya ang posibleng pagtaas ng mga vector-borne at water-borne diseases gaya ng dengue, typhoid at cholera. Nakatutok ang mga surveillance team at nakahanda ang mga kinakailangang gamot para sa mga posibleng kaso.
Samantala, hinikayat ng Malacañang ang publiko na maghanda para sa El Niño at iwasan ang panic buying, habang sinisiguro na nagsasagawa ng mga hakbang ang mga ahensya ng pamahalaan upang tugunan ang mga posibleng epekto nito.
