Dalawang magkahiwalay na insidente ng pananaksak kahapon, August 22, ang iniimbestigahan ng pulisya sa mga bayan ng San Jose at Santa Fe, Romblon, kung saan dalawang indibidwal ang nasugatan habang patuloy pang pinaghahanap ang mga suspek.
Sa San Jose, isang 23-anyos na babae ang nagtamo ng sugat sa kaliwang braso matapos umanong saksakin sa Sitio Inihawan, Barangay Lanas.
Ayon sa paunang imbestigasyon, bago ang insidente ay umano'y hinaras ng isang 24-anyos na lalaki ang isang anim na taong gulang na bata sa pamamagitan ng paghawak at pagpigil sa leeg nito.
Matapos sabihin ng bata sa kanyang mga magulang ang umano'y nangyari, hinarap ng ama ng bata at ng 23-anyos na biktima ang suspek. Dito umano naglabas ng patalim ang suspek at sinaksak ang babae bago tumakas.
Agad na dinala sa pagamutan ang biktima para sa kaukulang lunas. Nagsagawa naman ang pulisya ng hot pursuit operation upang mahanap at maaresto ang suspek.
Samantala, isang 28-anyos na lalaki naman ang nasugatan matapos umanong atakihin habang nagpapahinga sa loob ng isang bahay sa Barangay Danao Norte, Santa Fe.
Batay sa paunang imbestigasyon, isang lalaki ang umano'y pumasok sa lugar at inatake ang biktima gamit ang isang bladed farm tool. Nagtamo ng mga sugat ang biktima sa leeg at kanang kamay.
Agad ding dinala sa isang health facility ang biktima bago inilipat sa ospital para sa karagdagang gamutan.
Tumakas ang suspek matapos ang insidente at nananatili pang pinaghahanap ng mga awtoridad. Patuloy ang follow-up operation ng pulisya upang matukoy at maaresto ito.
Ayon sa Romblon Police Provincial Office, nagpapatuloy ang kaukulang imbestigasyon at law enforcement operations kaugnay ng dalawang insidente.
Discussion about this post