Sumailalim sa dalawang araw na hands-on training sa fish bottling technology ang mga kasapi ng Tugdan Fisher Folks Association sa Barangay Tugdan, Alcantara, Romblon upang mabigyan sila ng karagdagang kaalaman sa pagpoproseso ng isda at pagbuo ng mga produktong maaaring magkaroon ng mas mataas na halaga sa merkado.
Isinagawa ang Hands-on Post-Harvest Fisheries Training with Emphasis on Fish Bottling Technology noong Agosto 12–13 bilang bahagi ng livelihood intervention ng Bureau of Fisheries and Aquatic Resources (BFAR) para sa mga lokal na mangingisda.
Layunin ng pagsasanay na mapalawak ang kaalaman at kasanayan ng mga kalahok sa wastong pagproseso at pagpreserba ng kanilang mga huling isda, bukod sa pagbibigay ng oportunidad para sa value-adding at pagbuo ng karagdagang pinagkakakitaan.
Pangunahing tagapagsanay si Ms. Sheryll D. Montesa ng FPSSD-FPHMS, na nagbahagi ng kaalaman at mga wastong pamamaraan sa fish bottling technology.
Bilang bahagi ng hands-on training, aktuwal na isinagawa ng mga kalahok ang proseso ng paggawa ng produktong “PAK-AN in Spanish Style.”
Kabilang sa mga itinuro ang paghahanda ng mga sangkap, paglilinis at paghahanda ng isda, wastong pagtitimpla, sterilization, at tamang pagsasara ng mga bote upang mapanatili ang kalidad at kaligtasan ng produkto.
Katuwang sa pagsasagawa ng aktibidad ang BFAR secretariat at mga training facilitator na sina Ms. Gemma V. Letada, Ms. Maria Karina M. Morada, at Mr. Jerry S. Guro.
Dumalo rin si Tugdan Punong Barangay Jonel G. Musa, na nagpaabot ng suporta at pasasalamat sa BFAR at iba pang katuwang na ahensya sa pagbibigay ng ganitong oportunidad sa mga mangingisda.
Hinimok din niya ang mga miyembro ng asosasyon na gamitin at paunlarin ang kanilang mga natutunan upang makalikha ng karagdagang pagkakakitaan.
Katuwang din sa pagsasagawa ng pagsasanay ang Municipal Agriculture Office ng Alcantara sa pangunguna ni Municipal Agriculturist Alex John R. Galicia, sa pamamagitan ng koordinasyon sa BFAR at lokal na pamahalaan.
Sa pamamagitan ng pagsasanay, nabigyan ang mga mangingisda ng karagdagang kaalaman hindi lamang sa pangingisda kundi maging sa food processing at value-adding, na maaaring makatulong sa pagpapaunlad ng kanilang kabuhayan.
Inaasahang magagamit ng Tugdan Fisher Folks Association ang kanilang mga natutunan sa pagpapalawak ng mga fish processing initiative at pagbuo ng mga produktong lokal na maaari nilang maibenta sa mas malawak na merkado.
Discussion about this post