Nanawagan si Quezon 3rd District Rep. Reynante Arrogancia sa mga ahensya ng pamahalaan na repasuhin ang sunod-sunod na pagtaas ng pasahe sa mga RORO ferry, matapos umanong dalawang beses na tumaas ang singil sa loob ng iisang quarter.
Ayon kay Arrogancia, bagama’t liberalized ang inter-island ferry fares mula pa noong 1994, may mandato ang Maritime Industry Authority na bantayan ang presyo at tiyaking makatuwiran ang adjustments. Aniya, hindi nangangahulugan ang deregulation na maaaring magtaas ng pasahe nang walang malinaw na paliwanag.
Binigyang-diin din ng mambabatas na may domino effect ang pagtaas ng pasahe sa RORO sa presyo ng pagkain at iba pang pangunahing bilihin dahil sa epekto nito sa transportasyon ng mga produkto.
Hinimok ni Arrogancia ang MARINA na suriin kung makatwiran ang mga ipinatupad na fare increases, habang pinayuhan naman ang Philippine Ports Authority na repasuhin kung may mataas na port at terminal charges na maaaring nakadagdag sa gastos.
Iminungkahi rin ng kongresista na kung may sapat na basehan ang pagtaas ng pasahe ay dapat itong ipaliwanag nang malinaw sa publiko, ngunit kung wala ay dapat itong maitama agad upang maprotektahan ang interes ng mga pasahero at negosyante.
Idinagdag pa niya na maaaring magpatupad ang pamahalaan ng economic relief measures tulad ng tax credits para sa freight forwarders at maliliit na negosyo na apektado ng mataas na cargo rates, gayundin ang iba pang hakbang upang mabawasan ang epekto ng pagtaas ng gastos sa transportasyon.
