Inanunsyo ni Cajidiocan Mayor Marvin Ramos na inaprubahan na ng mga miyembro ng Protected Area Management Board (PAMB) ang panibagong protocol at requirements para sa mga mountaineer na aakyat sa Mount Guiting-Guiting Natural Park.
Ayon sa alkalde, hinihintay na lamang ang opisyal na dokumento mula sa Department of Environment and Natural Resources (DENR).
Sa kasalukuyan, umiiral ang status quo kung saan medical certificate at iba pang patunay ng pagkakakilanlan lamang ang kailangang isumite ng mga aakyat. Hindi muna mandatory ang certificate ng dalawang major climbs.
Batay sa ipinanukalang resolusyon na inaprubahan ng PAMB, tanging ang mga aakyat hanggang summit ang kakailangang magpakita ng patunay ng major climbs. Ang mga magtatapos lamang sa Camp 1, Camp 2 at Mayo’s Peak ay hindi na oobligahing magsumite ng naturang certificate, ngunit kinakailangang magpakita ng proof na naaayon sa kategoryang itinakda sa resolusyon.
Inihayag din ni Ramos na maglulunsad ng opisyal na Facebook page na pamamahalaan ng DENR-PAMO upang magsilbing pangunahing plataporma ng impormasyon ukol sa mga patakaran at anunsyo sa bundok.
Tinawag ng alkalde na isang mahalagang hakbang ang nasabing development para sa turismo ng Mt. Guiting-Guiting at ng buong Isla ng Sibuyan.
