Inilunsad ng Department of the Interior and Local Government (DILG) nitong Huwebes, Setyembre 11, ang Unified 911, ang kauna-unahang iisang emergency hotline na layong pagsamahin ang lahat ng lokal na emergency numbers sa bansa.
Sa ilalim ng bagong sistema, lahat ng tawag para sa pulisya, sunog, medikal na tulong, at iba pang sakuna ay idadaan sa iisang network na direktang konektado sa PNP, BFP, BJMP, at mga lokal na pamahalaan.
Ayon kay DILG Secretary Jonvic Remulla, layon ng Unified 911 na gawing mas simple at mabilis ang emergency response. Mula sa dating mahigit 200 emergency numbers, isang numero na lang ang kailangang tandaan ng publiko.
Target din ng ahensya na makapagtayo ng walo (8) pang call centers sa loob ng 120 araw at makamit ang limang minutong response time. Dagdag pa rito, ang bagong hotline ay kayang tumanggap ng tawag sa iba’t ibang wika gaya ng Tagalog, Cebuano, Ilocano, Waray, at Tausug.
Sa unang araw ng operasyon, umabot sa 58,000 tawag ang natanggap ng Unified 911. Gayunman, lumabas na 60% dito ay prank calls, dahilan para balaan ni Remulla ang publiko. Aniya, ang mga paulit-ulit na gumagawa ng bogus calls ay isasailalim sa “least priority” at maaaring hindi na muling makakuha ng tulong sa oras ng tunay na emergency.
Itinalaga ng pamahalaan ang ₱1.4 bilyon para sa unang yugto ng proyekto, kabilang ang pagbili ng karagdagang emergency vehicles, drones, at push-to-talk radios na gagamitin ng mga first responders.
