Isinugod ang isang rider ng motorsiklo matapos itong pumailalim sa salpukan ng minamanehong motorsiklo at kasalubong na dump truck sa bahagi ng kalsada na sakop ng Barangay Tubigon, Ferrol, Romblon.
Nangyari ang aksidente bandang alas-8 kaninang umaga.
Ayon sa ilang nakasaksi na nakausap ng Romblon News Network, pabalik na ng Odiongan, Romblon galing Poblacion ang hindi pa kilalang rider nang makasalpukan ang truck. Sinubukan pa umanong mag-preno ng driver ng truck ngunit hindi na naiwasang sumalpok ang kasalubong na rider.
Nagtamo ng galos sa katawan at sugat sa ulo ang rider kaya agad itong isinugod sa Romblon Provincial Hospital.
Patuloy na iniimbestigahan ng Ferrol Municipal Police Station ang aksidente at ang pagkakilanlan sa nasabing rider.
