Nasawi ang isang seaman na nasa Odiongan para sa kanyang bakasyon matapos masangkot sa isang motorcycle accident madaling araw ng Linggo, April 27.
Ang nasawing rider ay 40 anyos, residente ng Barangay Rizal.
Batay sa imbestigasyon ng Odiongan Municipal Police Station, pauwi na ng Rizal ang rider nang makasalubong nito sa may isang gasulinahan sa Barangay Tulay ang matulin na motorsiklo na minamaneho naman ng isang menor de edad. Nagsalpukan ang dalawa dahilan para tumilapon ang dalawa sa kalsada.
Base sa ulat ng pulisya mula sa CCTV footage sa lugar, kumain umano ng linya ng kalsada ang rider na menor de edad dahilan para makasalpukan nito ang nasawing rider.
Dead on arrival ang rider sa ospital ayon kay Odiongan Vice Mayor Diven Dimaala na isa sa mga sumaklolo sa lugar.
Nagtamo naman ng sugat sa iba't ibang bahagi ng katawan ang menor de edad na ngayonay nagpapagaling sa ospital.
