Sugatan ang isang lalaki matapos di umano itong pagsasaksakin ng ilang beses ng taong kanyang pinuntahan upang makipag-ayos sa Barangay Linawan, San Andres, Romblon.
Kinilala ang biktima sa alyas na “D”, habang ang suspek namang si alyas “J”, parehong residente ng Sitio Canlubang.
Ayon sa ulat ng Romblon Police Provincial Office, bandang 10:40 ng gabi noong Lunes, April 7, nang puntahan ng biktima ang bahay ng suspek upang makipagkasundo. Gayunman, nauwi ito sa mainitang pagtatalo.
Nagawang awatin ng ama ng biktima ang dalawa at pinauwi si D. Ngunit sa kanyang pagtalikod, bigla umano siyang sinaksak ni J.
Sa kabila ng tinamong sugat, nagawa pang tumakbo ng biktima upang humingi ng tulong at isinugod siya sa San Andres Municipal Hospital.
Samantala, kusang sumuko ang suspek sa San Andres Municipal Police Station matapos ang insidente. Siya ay kasalukuyang nakakulong at nahaharap sa kasong frustrated murder.
