Hinikayat ni Commission on Higher Education (CHED) Commissioner Michelle Aguilar Ong ang mga Romblomanon, lalo na ang mga solo parent at working student, na alamin at samantalahin ang mga programang inaalok ng Romblon State University (RSU) upang magkaroon ng mas maraming oportunidad sa edukasyon at trabaho.
Sa panayam ng Philippine Information Agency (PIA) Romblon sa sidelines ng paglulunsad ng Project PAG-IBIG at Family Empowerment Center ng RSU noong Hunyo 3, sinabi ni Ong na bukas ang unibersidad sa iba't ibang uri ng mag-aaral na nais makapagtapos ng pag-aaral.
“Gusto ko lang imbitahan ang mga Romblomanon na kayo ay pumunta sa Romblon State University. Alamin ninyo kung ano ang mga programang mayroon sila. Kung ikaw man ay solo parent o working student, marami silang programa para sa inyo,” ani Ong.
Binigyang-diin din niya ang kahalagahan ng pagtatapos ng pag-aaral bilang daan sa mas magandang oportunidad sa buhay.
“Sana lahat ng pamilya dito sa Romblon ay may diploma. Ticket mo ito para umangat ang buhay mo,” dagdag niya.
Ang Romblon State University ang nag-iisang state university sa lalawigan na nag-aalok ng iba't ibang degree programs sa undergraduate at graduate levels sa mga kampus nito sa iba't ibang bayan ng Romblon.
Kamakailan lamang ay binuksan din ng unibersidad ang Expanded Tertiary Education Equivalency and Accreditation Program (ETEAP), isang alternatibong sistema ng edukasyon para sa mga nagtatrabahong indibidwal at mga propesyunal na may sapat na karanasan sa trabaho ngunit hindi nakatapos ng kolehiyo.
Sa ilalim ng ETEAP, maaaring kilalanin ang mga natamong kaalaman, kasanayan, at karanasan ng isang indibidwal upang mabigyan siya ng pagkakataong makakuha ng kaukulang college degree nang hindi kinakailangang dumaan sa tradisyunal na apat o higit pang taong pag-aaral sa unibersidad.
Ayon sa CHED, mahalagang mapalawak ang access sa higher education upang mas maraming Pilipino ang magkaroon ng pagkakataong makapagtapos ng kolehiyo at mapahusay ang kanilang kakayahan para sa trabaho at kabuhayan.
