Isang graduate ng Romblon State University (RSU) Main Campus ang nakapasok sa Top 5 ng March 2026 Licensure Examination for Professional Teachers (LEPT).
Nagtala si Paul Kennedy Fajel, 23 anyos, ng average na 94.20 percent sa secondary level examination, ayon sa inilabas na resulta ng Professional Regulation Commission (PRC).
Si Fajel ay nagtapos ng Bachelor of Secondary Education major in Science bilang bahagi ng Class of 2025 ng RSU Main Campus. Anak siya nina Engr. Berlito Fajel Jr. ng Municipal Planning and Development Office ng Calatrava at Rosalie Fajel.
Ayon kay Fajel, hindi niya inaasahan na mapapasama siya sa Top 5 ng board examination.
“Medyo nakakagulat lang po kasi hindi ko po talaga expect na makakapasok ako sa Top 5. Noong time ng exam marami po akong iniindang pananakit ng katawan katulad sa likod kaya hirap makapag-focus. Parang na-blockout pa po ako sa exam, but I thanked God dahil nakapasok po ako,” ani Fajel.
Ibinahagi rin niya na online review lamang ang kanyang ginawa bilang paraan upang makatipid sa gastusin at pamasahe.
“Nag-online review lang po ako para makatipid sa gastusin at pamasahe. Mas convenient po kasi sa akin at sanay din po akong mag-review nang mag-isa sa bahay,” dagdag niya.
Sa Odiongan siya kumuha ng board examination noong Marso.
Inialay naman ni Fajel ang kanyang tagumpay sa kanyang pamilya, lalo na sa kanyang mga magulang na patuloy umanong sumuporta sa kanya.
“Inaalay ko po itong pagiging topnotcher ko lalo na kay mama na patuloy po akong sinusuportahan kahit marami kaming problema. Hindi niya po ako pinabayaan. Pati na rin po kay papa na sumusuporta sa amin financially,” aniya.
Nagpasalamat din siya sa mga paaralang kanyang pinasukan mula elementarya hanggang kolehiyo.
“Sobrang thankful din po ako sa mga schools na napasukan ko mula elementary hanggang RSU. Hindi ko po makakamit ito kung hindi dahil sa kanila. Simpleng mag-aaral lang din po ako at wala po akong gaanong achievement noon kaya thankful po talaga ako sa ipinagkaloob ni Lord,” saad niya.
Ayon sa PRC, kabuuang 63,377 examinees mula sa 94,357 ang pumasa sa March 2026 LET, katumbas ng 67.17 percent passing rate.
Sa naturang bilang, 18,376 elementary teachers mula sa 32,796 examinees ang pumasa habang 45,001 secondary teachers mula sa 61,561 examinees ang matagumpay na nakapasa sa pagsusulit na isinagawa noong Marso 15 sa mahigit 40 testing centers sa buong bansa.
